Зориг Ардчиллын Хүрээлэн 2024 оны Монгол Улсын Их Хурлын сонгуулийн үеэр нийт 21 аймаг, нийслэлийн 9 дүүрэгт сонгуулийн ажиглалт хийлээ. Энэ удаагийн ажиглалтад 300 гаруй сайн дурын ажиглагч оролцож, санал хураалтын өдрийн үйл явцыг бүрэн хянан ажигласан болно.
Ажиглалтын тайланд санал хураалтын байрны бэлтгэл, сонгогчдын бүртгэл, санал тоолох үйл явц, гомдол маргааны шийдвэрлэлт зэрэг асуудлуудыг дэлгэрэнгүй тусгасан. Мөн өмнөх сонгуулиудтай харьцуулсан дүн шинжилгээ хийж, ахиц дэвшил болон анхаарал хандуулах шаардлагатай асуудлуудыг тодорхойлсон.
Тайланг бүрэн эхээр нь хүрээлэнгийн цахим хуудаснаас татаж авах боломжтой бөгөөд олон нийтийн хэлэлцүүлэгт оруулахыг уриалж байна. Энэхүү ажиглалтын тайлан нь Монгол Улсын сонгуулийн тогтолцооны ил тод, шударга байдлыг хангахад чухал хувь нэмэр оруулах юм.
